回复：LP回來了？
轉貼自<黑胶樂园>
下午去2007視聽展，無幾耐轉掛 8號風球，全場人數激減，0岩晒，可以慢慢睇，慢慢聽。今次期待要一睹真面目既當然係 Linn LP12盤的兩件新 upgrade 法寶 - Keel 轉盤底板及Ekos SE臂。前者 HK$31000後者HK$49000。加埋8餅冇找。但最抵死係塊Keel唔連轉盤軸 bearing。咁咪要將原有既Cirkus 板粒bearing 拆落黎裝上去塊Keel個度。咁你想將塊Cirkus底板賣番幾千銀幫補下都唔得而只有掉落垃圾桶。如果你果個LP12係原本無 Cirkus Bearing 就大濟勒。唔該你再多花HK$8000買塊Cirkus板拆粒 bearing 黎用。呢樣野令我對 Linn 之「無良奸商」本色極之反感。塊Keel 板你點睇都唔值三萬銀，好心佢裝番粒比 Cirkus bearing 更高級精密既 bearing 補下數啦！支 Ekos SE 臂值唔值你自已諗，佢話用炭纖造，(不過之前睇英國報導又話用 Titinium造，唔知邊個0岩)咁依家支EKos II 都賣緊HK$25000，SE貴一倍，隨佢開價。不過如果裝埋呢兩件法寶，成套 Linn LP12 系統就要超過廿幾皮野，成架豐田 Camry咁貴，買萬事得 M6 Sports option 都重可以。以佢既真材實料天價驚嚇度攞足一百分有凸。
咁裝左呢兩件法寶既 Linn 聲音又點呀？現場當然用足料 linn 全線高檔器材一條龍去示範啦。嘩，一開聲，不得了，同唱部 Linn CD 差唔多聲又或者好唔得幾多。咁又或者部 Linn CD 實在太好聲勒。可能的 Linn engineer 用部CD機黎做較聲 reference，研究出呢兩件法寶，用部經典LP12模擬的干淨清透響亮既CD聲。頂瓜瓜。各位你地自己去親耳聽聽啦。
講到這度，我只有更加鍾意玩我部二手 linn。
聽完 Linn 順便當然聽下的百百萬萬聲既貴族黑膠盤啦。不過呢的咁貴既盤，一世都買唔到，聽完算數，不留一點印象，事關佢靚聲係應該既，唔靚聲咪掉落鹹水海算數，因為買得起既都係富豪，使一百幾十萬濕濕碎。送俾我都驚壓碎的地臺階磚，所以睇完聽完享受一輪算啦，講多都無謂。
